പുറമ്പോക്കിലെ കുട്ടി

പുറമ്പോക്കിലെ കുട്ടി സ്കൂളിലേക്ക്

യാത്രയാവുകയാണ്

അവൾ ഉണരുന്നതിനു മുൻപ്

പണിക്ക് പോയ അമ്മയെക്കുറിച്ച്

ആ പിളകെട്ടിയ കണ്ണുകളിൽ പരാതികളില്ല

നിറം മങ്ങിയ വസ്ത്രം കീറിയതെങ്കിലും

അമ്മ അത് തുന്നികൂട്ടിയിരുന്നു

പുസ്തകങ്ങൾ തോളേറ്റുന്നതിനു മുൻപ് ,

കാണാപാഠം പഠിക്കേണ്ട പദ്യം

ഒരാവർത്തി കൂടി വായിച്ചു.,

"രാവിലെ അമ്മ കുളിപ്പിക്കും

പുത്തനുടുപ്പുകൾ അണിയിക്കും

ഉമ്മയോരായിരം ഒന്നിച്ചെൻ

കവിളിൽ തന്നു ചിരിപ്പിക്കും"

(1998ല്‍ എഴുതിയ കവിത.

കലാകൌമുദി യിലേക്ക്

അയച്ചിരുന്നു

"പ്രസിദ്ധികരണ യോഗ്യമല്ലാത്തതിനാല്‍"

തിരിച്ചയച്ചു)

മൈക്രൊപൊളിറ്റിക്സ്

ആശുപത്രിയിലെ

ശീട്ടെഴുത്തുകാരന്‍ ചോദിച്ചു

പേര്:;

വൃദ്ധന്‍ പേര് പറഞ്ഞു

വയസ്സ്......

വയസ്സും പറഞ്ഞു

ഏതു ഡോക്ടര്‍

മൂന്നമത്തെ ചോദ്യത്തിന്

വൃദ്ധന്‍ പരുങ്ങി

ശീട്ടെഴുത്തുകാരന്‍

വിശദീകരിച്ചു

ഹൃദയ രോഗമാണെങ്കില്‍

ഡോ-സാമുവല്‍വര്‍ഗ്ഗീസിനെ

കാണണം

ഹൃദയത്തിന്റെ തന്നെ വാല്‍വിനാണ്

പ്രശ്നമെങ്കില്‍

ഡോ-ജോണ്‍മത്തായി

അസ്ഥിരോഗത്തിന്

ഡോ-പിള്ള

ഡോ‌-വൈദ്യനാഥന്‍

ഉദരം

എല്ലാം ബോഡില്‍ എഴുതി

വച്ചിട്ടുണ്ട്

വിശദീകരണത്തിനു ശേഷവും

വൃദ്ധന്‍ കുഴഞ്ഞു നിന്നു

അപ്പൊള്‍ പിന്നില്‍ നിന്നും ആരൊ

വിളിച്ചു പറഞ്ഞു

ഭക്ഷണം കഴിക്കത്തതാണ് അയാളുടെ

പ്രശ്നം സാറേ........

എങ്കില്‍ അവിടെ

തെരുവിലേക്കു വിരല്‍ ചൂണ്ടി

ശീട്ടെഴുത്തുകാരന്‍ ആക്രോശിച്ചു

വൃദ്ധന്‍ തെരുവിലെത്തുമ്പൊള്‍

ജാഥകള്‍ ആരംഭിച്ചു കഴിഞ്ഞിരുന്നു

ആദ്യം സ്ത്രീകളുടേതായിരുന്നു

പിന്നെ പരിസ്ഥിതിക്കരുടെ

വേശ്യകളുടെ

ഹിജഡകളുടെ

ഏറ്റവും ഒടുവില്‍ ദളിതരുടെ

എല്ലാം പോയ്ക്കഴിഞ്ഞു

എന്നിട്ടും

തെരുവ് ശൂന്യമാണ് എന്നു

ധരിക്കരുത്

തെരുവില്‍ നല്ല തിരക്കയിരുന്നു

പക്ഷേ;എല്ലാവരും ഒറ്റക്കയിരുന്നു

(2000 ത്തില്‍ എഴുതിയത് ..

മുംബൈ യിലെ

സാംസ്ക്കാരിക

സംഘടന യായിരുന്ന

"ഡക്കോറ "യുടെ

മുഖ പത്ര മായ

"സംഘ ഗാന"ത്തില്‍

പ്രസിദ്ധീകരിച്ചു )

ചില്ലു കൂട്ടിലെ കുട്ടി

ബെന്‍സ് കാറിലിരുന്ന്

ബലൂണ്‍കാരനെ നോക്കി

കുട്ടി കരഞ്ഞു

പിന്നെ ചിരിച്ചു

അപ്പൊള്‍ അകലെ

ചില്ലുകൂട്ടിലെ പാവ് നോക്കി

കരഞ്ഞിരുന്ന ബലൂണ്‍കാരന്റെ കുട്ടി

ഇപ്പൊള്‍ ചിരിച്ചിട്ടുണ്ടാകും

(1996 ല്‍)

മടക്കയാത്ര

ഇനി നമുക്ക് കൊട്ടാരത്തിലേക്ക് മടങ്ങാം

അവിടെ കേരളീയതയുടെ തനിമയുണ്ട്

അവിടത്തെ കാഴ്ച്ക്കായ്

നിറവും മണവുമുള്ള പൂക്കള്‍

കൊണ്ടുപോകാം

എന്നാല്‍ സുന്ദമായ പൂക്കള്‍ വില്‍ക്കുന്ന

സുന്ദരിയല്ലാത്ത പൂക്കാരിയേക്കുറിച്ച്

നിങ്ങള്‍ അവിടെ പറയരുത്

നമുക്ക് ഉജ്ജയിനിയിലേക്ക് യാത്ര തുടരാം

വീണ്ടും കൃഷ്ണ ലീലകള്‍ പാടാം

കല്ലുരുട്ടിയ ഭ്രാന്തന്റെ കഥ പറയാം

എന്നാ ല്‍

വഴിയില്‍ ഭടന്റെ കുന്തത്തിനിരയായ

മനുഷ്യ ജന്മങ്ങളെക്കുറിച്ച് നമുക്ക് നിശബ്ദരാകാം

എന്തെന്നാല്‍

രാജാവിന്റെ കൈകരുത്തും

വാളിന്റെ തിളക്കവും

എത്ര പാടിയാലും തീരില്ലല്ലൊ.

(1995 ല്‍ എഴുതിയത്

മുംബൈ കേരളലീയ

സമാജത്തിന്റെ പത്രമായ

വിശാലകേരളത്തില്‍ പ്രസിദ്ധീകരിച്ചു)

സ്ത്രീ , ദളിതന്‍ , തൊഴിലാളി

അമ്മയുടെ വാക്കു തെറ്റിക്കാതിരിക്കാന്‍

അവളെ പങ്കുവച്ചു

എന്തെന്നാല്‍ ആഹാരം പോലെ

അവളെയും പങ്കുവെക്കാവുന്നതാണ്

ജന്മാവകാശങ്ങളില്‍പ്പെടാത്ത

ആയുധ വിദ്യ അഭ്യസിച്ചപ്പോള്‍,

തപസ്സനുഷ്ടിച്ചപ്പോള്‍ ,

അവനെന്തു സംഭവിച്ചു

പിതൃരക്തത്തിന്റെ മാനംകാക്കാന്‍

പടക്കളത്തില്‍ പൊരുതി വീണപ്പൊള്‍

ഭഗവാന്‍ എന്തിനാണ് ചിരിച്ചത്

ബലമേറിയ വില്ലും

മൂര്‍ച്ചയേറിയ അമ്പും

വേഗത്തില്‍ പായുന്ന തേരും

ഒരു രാജാവിന്ടെ

കരുത്തുറ്റ

ചരിത്ര വിശേഷണങ്ങളാവാം

എന്നാല്‍

കരുത്ത് നഷ്ടമായ തൊഴിലാളി

ചരിത്രത്തില്‍ നിന്നും

എന്നും കുഴിച്ചുമൂടപ്പെട്ടിരുന്നു.

(1998ല്‍ എഴുതിയ കവിത.

മാധ്യമം വാരികയിലേക്ക്‌

അയച്ചിരുന്നു

പ്രസിധികരിച്ചി ല്ല

തിരിച്ചു വരാനുള്ള സ്റ്റാമ്പ്‌

എഴുത്തിന്റെ കൂടെ

വക്കാതിരുന്നതിനാല്‍

അത് തിരിച്ചും വന്നില്ല )

ബാക്കി പത്രം

കര്‍ട്ടന്‍ ഉയര്‍ന്നു

നാടകം ആരംഭിച്ചു

ഭക്ഷണ ശാലയാണ് രംഗം

വിളമ്പുന്നവനും

കഴിക്കുന്നവനും മാത്രം

വയറു നിറഞ്ഞവന്‍

രംഗം വിട്ടപ്പോള്‍

കീശ നിറഞ്ഞവനും

രംഗത്താവിശ്യമില്ല

സമാപ്തം

കര്‍ട്ടന്‍ വീണു

കാഴ്ച്ചക്കാരും

അഭി നേതാക്കളും

ഒഴിഞ്ഞു പോയി

പ്രേക്ഷകര്‍ കാണാത്ത

കര്‍ട്ടന്‍ വലിക്കുന്നവനും

കട്ടൌട്ട് അഴിക്കുന്നവനും

മാത്രം ബാക്കി

അതെ ഭക്ഷണ ശാലയിലെ

ചട്ടി കഴുകുന്നവനും

നിലം തുടക്കുന്നവനും മാത്രം

അവിടെ അവശേഷിച്ചി രുന്നു

(1999ല്‍ എഴുതിയത് )

പത്രവാര്‍ത്ത

ചൂടുള്ള വാര്‍ത്ത

പത്ര വില്‍പ്പനക്കാരന്‍ അലറി

മഞ്ജു വാരിയര്‍

വിവാഹിതയായി

ക്ലിന്റന്

ഒരു കാമുകി കൂടി

സച്ചിന് ലോക റെക്കോട്

ഇന്നലെ

പട്ടിണി കിടന്നു മരിച്ച

തെരുവ് ബാലാ

നിന്‍റെ തണുത്ത വാര്‍ത്തകള്‍ഞങ്ങള്‍ എന്നേ മറന്നു

(1999 ല്‍ എഴുതിയത്)